British Columbia / Alberta

Z'Vancouver hei mir ja der Camper em Dsischti' 4. September 2007' choenne ga abhole. Es isch Labour Day-Weekend gsi. Es het ues niemmer choenne saege wiso, aber Maenti isch oemu frei gsi. Mir hei der ganz Morge gha, bis mir der Canadian Camper Van-Vermieter hei gfunge. Em haubi 12i si mir dert gsi u statt 2 Stung hei mir 4e fuer d'Uebernahm gha. Uese Camper isch no nid parat gsi u er het sogar no uf d'Versicherig muesse ga z'Nummero loese! Het Zyt u Naerve gchostet !

Wo mir der Camper aendlech hei gha, si mir zum Flughafe. Mir hei dert no der Simon troffe. Er het mir via Susanne es Aromat, Schoggi u liebi Gruess vo dahei bracht. Het mi u gfroeit ! Vo dert si mir zum Hostel, isch ja scho veiechli spaet gsi. Mir hei der Camper igrumt u si no ei Nacht dert blibe.

Naer isch uesi Reis im Weste so richtig los gange. Mir hei scho em dritte Tag e Schwarzbaer gseh! Mir hei naebeusse wiud campiert u er isch oepe 200 m vor ues ueber d'Strass glofe. So cool!

Em Morge druf isch aber uese Camper nuemme glofe, d'Batterie isch leer gsi. U das scho em Afang! Mir hei bekanntschaft mit Iheimische gmacht. Si i sehr fruendlech gsi u si hei ues ghuufe. Hei ne ueberbruegt u si naer zu re Garage.

Mir si vo Vancouver us nach Whistler gfahre. Dert isch de im 2010 d'Olympiade u mir si scho dert gsi  ! Mir si witer noerdlech gaege Prince George. Ungerwaegs si mir no ga Guudwaesche. De Waeg heisst ja nid fuer nuet, "Gold Rush Trail" oder so. Hei sogar gfunge ! Si aber nid wuerklech richer...

Vo dert si mir gaege Jasper Nationalpark. Mir het der Waeg dert haere, duer d'Rocky Mountains, sehr guet gfaue! Ha im Oste d'Baerge vermisst. Mir hei 10 Tag super Waetter u nume blaue Himmu gha. D'Ussicht isch eifach super gsi! Me fahrt richtig uf di Baerge zue u dertuer.

Z'Jasper si mir uf em ne risige Camping-Platz gsi, um di 700 Plaetz, aber nume weni (40) mit Elektrizitaet. Es isch chaut gsi u mir hei ues aube e Bettflaesche gmacht, so ischs guet gange. Si chli verweichlechet, im Zaeut hei mir sicher aube nid wermer gha... Dert hei mir Hirsche gseh, si si grad naeb uesem Camper duere u uf em ganze Platz desume glofe!

Mir si bau chli spaet gsi u viu Camping-Platz hei scho zue ta, so schad. Drum si mir naer  nid so lang im Jasper Nationalpark blibe. Mir hei dert viu schoeni Usflueg gmacht u si naer gaeg e Banff Nationalpark gfahre.

Vo dert a hets bau nume no einisch graegnet. Drum si mir i d'Upper Banff Hotsprings. Bim haereloufe hets sogar gschneit! Heis sehr gnosse u oemu warm gha  !

Mir hei naer so schnaeu wi  mueglech i z'Okanagen Valley woeue.  Das sig schins  z'Tessin vo Kanada, aber o dert chas u hets graegnet... Dert isch d'Gaegend ganz angers. Es het viu chlineri kargi Baerge u i de Taeler ischs gruen. Isch sehr bekannt fuer di ville Fruecht. Si chli z'spaet cho: Pfirsich, Pflume, Chrischi u so si scho duere gsi. Derfuer hets viu Oepfu, Bire u Trube gha. Si grad richtig zum Weinfestival cho u si o mau ga degustiere !

Im Okanagen Vally si mir raecht lang gsi. Si zwoei mau ga d'Lachse luege. Isch sehr idruecklech! Si si ganz rot, hei meistens e gruene Chopf u es siuberigs Muu. Di Fische schwuemme tagelang der Fluss uf, leiche dert u staerbe naer... So isch d'Natur.

Wo mir's scho nuemme hei erwartet, hei mir nomau e Baer gseh! Eigentlech em ne raecht belebte Ort, em Strand, bim PicNic-Platz u emne Spiuplatz. Mir si im Camper gsi u der Baer isch zum Ghuederchuebu, wo genau naeb ues isch gsi! So cool! Hei ne wuerklech u nach gseh!

Em Sunndi hei mir der Camper usgruhmt, putzt u vorgester z'ruegg gae. Mir si froh, isch aues guet gange!

Iz si mir z'Downtown Vancouver im ne HI-Hostel. D'Taeschene si Packt u der letscht Tag z'Vancouver isch scho gli duere. Nume no e Naecht u naer fluege mir i d'CH. Froeie mi henne !