Vancouver u Vancouver Island

Iz ha i mi scho wider u lang nuemme gmaeudet. Ha bis iz e PCfreii-Zty gha . Mir hei viu gmacht, gseh u erlaebt!

Vo Edmonton si mir mit em Zug uf Vancouver, hei e 4er Sitz gha u em Abe hei si ues zwoei Bett drus gmacht. Hei fein gaesse, geng choenne Kafi u Fruecht naeh u super gschlafe. O vor Gaegend haer isch das bau di schoenschti Strecki gsi. Mir si duer d'Rocky Mountains gfahre u hei super Waetter gha. Has sehr gnosse! Em liebste waer i z'Vancouver no nid usgstige, het mir passt !

Im Zug hei ues zwe erklaert, wi mir "easy" uf Vancouver Island choeme: Skytrain, Bus, Watherbus, Bus, Fery. So easy isch de das mit dem ganze Gepaeck nid gsi !

Mir heis aber so gmacht u si naer kaputt z'Vancouver Island acho. Z'Nanaimo hei mir es Taxi zum Hostel gnoh. Im Zimmer hei mir jedes Wort u Lied vor Bar unger ghoert. Hei gar nid ache muesse! Isch aber i gueter Lag gsi, nach em Wasser u bim ne Shopping-Center.

Mir si z'ersch z'Nanaimo gsi. Vo dert hei mir mau Tagesusflug mit em Zug uf Courtenay gmacht. Einisch hei mir fuer ei Tag es Outo gmietet u si uf Tofino. Isch sehr bekannt waeg em Long Beach u sine Waeue u natuerlech de Surfer. Isch wuerklech e schoene, laenge Strand. Leider hets afa raegne u mir si nid so lang dert gsi. Hei no z'Dorf Tofino agluegt u si em Abe wider z'Nanaimo gsi. Mit em Zug um letschte Tag uf em VIARail-Pass si mir uf Victoria. Victoria isch d'Houptstadt vor Provinz British Columbia. Dert hets mir o sehr guet gfaue. Isch wi Nanaimo schoen em Hafe u es haerzigs Stedtli.

Vo dert us si mir mit em Schiff inkl. Whale-Watching-Tour uf  Vancouver. Mir hei ganz nach vo Vancouver Island drei Orkawale (Killerwale) gseh! Di si risig! So cool! Si sige em jage gsi u drum si si nid so hoech us em Wasser cho. Isch raecht e laengi Schifffahrt gsi u bi wider chli seechrank worde.

Z'Vancouver acho, si mir i nes Hostel, i z'einzige, wo no Platz het gha. Das isch chli naebeusse em Jerichobeach. Der Strand, Park u Waud het mir guet gfaue. Z'Wasser isch aber chaut gsi. Mit em Boes si mir schnau ir Stadt gsi u si chli Vancouver ga aluege. Isch e risigi Stadt i super Lag: Nach em Meer u de Baerge!