Ville du Québec

Ville du Québec

Ir Nechi vo Québec hei mir ä schönä, grossä Camping-Platz gfungä. Dert si mir zwöi mau übärnachtät, dass mir d`Stadt hei chönnä ga aluägä. Äm drittä Tag isch auäs bsetzt gsi u mir hei näbädrannä uf äm nä chlinärä Camping-Platz üsäs Zäut ufgsteut.

 Där Namä vo Québec chunnt us där Algonkinsprach u bedütät "wo där Fluss enger wird". Ville du Québec isch ä grossi Stadt mit 700`000 Iwohnär, abär äs het mir sehr guät gfauä! 1985 isch di Stadt vor UNESCO zum Wäutkulturerbe ärklärt wordä. 95 % vo dä Lüt gäbä dert Franz aus Muätärsprach a. Äs sig ä Hochburg vo Separatischtä, wo ä Unabhängigä Staat Québec vordärä.

Äs het ä Haute- u ä Basse-Ville. Ir Haute-Ville (Obärstadt) hei früächär aubä di richä Lüt gwohnt. Dert hets grossi Hüsär u Schlössär. Vo dert obä gseht mä o uf ä Hafä achä. Ir Basse-Ville (Unterstadt) hei di Armä ganz nach zämä u i chlinä Hüsär gwohnt. Iz ischs sehr schön mit viunä Café u Lädäli.

Mir si o dert widär uf ä Turm, für d`Stadt vo obä azluägä. Äs isch eigäntläch meh äs Hochhus. Im 31. Stock cha mä när ga achäluägä. Mir si chli spät gangä, hei no chönnä drumum loufä u när hei si üs grad usägschossä. Därfür hei mir ke Itritt müässä zahlä .

Ir Nechi vo Québec isch där Parc de la Chute Montmorency. Isch sehr ä schönä Wassärfau! Dä isch sogar 30 m höchär aus d`Niagara-Falls. Haut wenigär bekannt u scho wenigär imposannt wüu är wenigär breit isch u wenigär Wassär het. Si heis abär schön gmacht, dass mä cha d`Stägä uächä loufä (487 Trittä), när übär d`Brügg u mit äm Bähndli si mir widär achä.

Mir si witär auäs äm Fleuve St. Laurent gfahrä u iz sogar scho bi Gaspé värbi. Hiä hets ganz schöni Klippänä. D`Landschaft isch viu rüchär, äs het viu Näbu u zur Zyt rägnäts viu. D`Lüchttürm gfauä mir u passä sehr guät da härä. D`Sunnä-Unärgäng si där Hammär! I schribä mau de no chli meh vo derä Gägänd.

Liäbi Rägä-Grüäss i d`Rägä-Schwiz !