Montréal

Montréal

Mir si när gägä Montréal gfahrä u ohni z`merkä mits dri gfahrä. D`Camping-Plätz si denn scho zuä gsi u mir hei haut z`St. Philippe im Outo (uf äm nä Parkplatz) übärnachtät. Äm nächschtä Tag hei mir abär ä schönä Platz gfungä. Hei ja dänkt, wäg äm Canada-Day fingä mir villäch gar ke Platz meh u drum si mir grad dert blibä. Wüus dert bau numä eutäri Lüt het gha, isch äm Canada-Day o ke Party gsi u o schüsch het mä nüt gmerkt. Drum si mir när äm Abä uf Montréal a z`internationalä Jazz Festival gangä. Isch auso no schön gsi u äs isch chli Open-Air-Stimmig ufcho. Füürwärk odär so hei mir nid gseh, di fiirä nid so wi mir där 1. Ouguscht ! Äm heiga hei mir üs widär mau bodäbös värfahrä u hei öpä viär mau so lang gha, aus normau...

Äm nächschtä Tag si mir Vieux-Montréal ga aluägä. Dert hets viu auti Geböide u näbä drannä si när ganz nöii bout wordä. Het auso nid so passt. Äs het o äs Notre-Dame, abär i bi ja ersch grad z`Paris gsi u drum si mir sä nid vo innä ga luägä. Z`Hôtel de Ville isch o grad dert ir Nechi, isch sehr bekannt u gseht o no guät us. Z`Ganzä isch scho rächt touristisch, äs het viu chlini Lädäli mit Postchartä u Souvenirs. Dasmau hei mir üs äxtra früächär uf ä Heiwäg gmacht, wüu mir üs i wi gwohnt värfahrä hei ...

Nach ärä guätä Nacht i üsäm Zäut si mir zum Olympiastadion Parc Olympic. Das isch für d`Olympiadä 1976 bout wordä. Isch abär nid rächtzytig fertig gsi. D`Montréalär heis nid so gärn u sägä nim numä "the big owe" = "der Schuldenberg". Si müässä no hüt i Form vo rä Olympia-Stür di C$ 1 Milliardä abzahlä. Där Turm het ä 45°-Winku u isch mit 175 m där höchscht freistehänd schreg Turm vor Wäut. Mir si uächä u hei d`Ussicht übär Montréal gnossä. Bi guätäm Wättär würd mä 80 km wit gseh. Isch scho viu wenigär höch aus där CN-Tower z`Toronto, abär glich schön u mä het chli ä Ahnig wi gross di Stadt isch. U vo denn a hei mir üs o nümme gross värfahrä. Wo mir när witär gägä Quebéc si gfahrä hättä mir üs afangs veiächli uskennt ...

Iz si mir scho fasch z`Quebéc, z`nächschtä mau schribi de vo dert us. Häbäts guät u bis gli widär!