Bangkok zum Zweite

Ich weiss, es tuet mer leid! ich hocke da sit mittlerwiile fascht eim monet und mer choennt ja meine ich heigi gnueg ziit (was leider au de fall isch) aber die verbring ich mit esse und usgang :) de plan isch ja gsi, dassi in bangkok fuer ei wuche bliibe und denn wiiter nach chiang mai gange, aber ebe, d sarah hed das alles chli zunderobsi bracht! also, wieso au nid es bitzli laenger da bliibe, ich han ja kei ziitdruck.

also, zum mal afange, am 05. dezember (jesses, das isch ja scho uuuuu lang haer) isch em king sin geburtstag gsi und die stadt isch eifach duretreit!!! mer treit es gelbs t shirt a jedem maentig da, mit de ufschrift *i love the king* natuerlich in thai (nei, erwartet gar nid vo mier dassi weiss wie mer das schriibt, aber ich han au eis vo dene, also choends denn diheime aluege :) will de king amene maentig gebore isch! und eigentlich traegets das gelbe liibli sowieso taeglich, will de koenig isch eifach en ganz tolle typ!(oder d thais woni kaenneglernt han vereehred ihn alli!!). ebe und am 05. dezember hends denn es riiiise faescht gha! ueberall isch sis bild ghanget, d strasse sind gelb worde vor luuter mensche!!! und au d sarah und ich hend mitgmacht...natuerlich hend mier es paar komischi blick uebercho, aber die meischte hend sich gfreut dass mier ues ihne aapasset...aber a die boese blick gwoehnt mer sich, mier lueget ja d tourischte bi ues im land allig au bitz komisch a!!

nachem king sim geburtstag sind uesi aktione dur de tag dur radikal de berg durab...will, wie scho erwaehnt, mier schlafet halt mehrheitlich am tag und sind nachtaktiv worde.

han mier nach de erste wuche es thai phrase book zuetah und versueches jetzt mal mit ere voellig neue sprach. und stueck fuer stueck verstahni scho es bitzli, natuerlich nur d basics, aber d thais freuts wenn mer sich d mueh gid sie z verstah und es lache da isch eifach unbezahlbar!

die letschte paar taeg simmer ab und zue mal uf de khao san road ghoecklet und hend es paar luschtigi kanadier und australier kaenneglernt. vorgeschter zum bischpil hed eine vo dene d idee gha, mer choennt ja es tuk tuk raenne verastalte (am morge am 3!!!) und so hemmer ues uf 3 tuk tuks ufteilt und sind dur d strasse vo bangkok graset! mier sind traene cho vor lache! leider hemmer nur zweite gmacht (die wo gwunne hend, hend au betraechtlich meh zahlt als mier, also....gwuenne dur erpressig...nene...die eigentliche gwuenner sind mier gsi demfall!)

denn hani es uu haerzigs cafe gfunde wo mier en richtige caffe latte macht zum zmorge. und im cafe schaffet zwei schwoeschtere d sama und d dugmaa...und wenn immer mier nach kafi oder emene naette gspraech isch, denn gahni sie go bsueche....dank de sama chani etz scho uf 10 zelle in thai und han es paar unnuetzlichi woerter wie wasserfall und macho glernt :) sie wiederum hend mier foeteli vo ihrem hoochsig und ihrne chinde zeigt und verzellet mier taeglich neui chlini gschichte ueber d mentalitaet da.

es anders mal bini vom ngng, de choch naeb de bar lamphu (wo d sarah und ich jede abig live musig und uesi whisky gnuessed) zu sine fruende hei iiglade worde. im normalfall wuerd ich so oebbis ja nid mache, aber ich chan ihm vertruue und kaenne ihn sit mittlerwiile 3 wuche, und so simmer z 3te det ane gange. bevor mer acho sind isch mer no chli unwohl gsi. bin ich aecht willkomme? machts ihne nued us en westener bi sich diheime z ha fuer es paar stund? (de ngng hed ihne nued devo verzellt, dass ich au mitchume) mit gmischte gfuehl bini also i das taxi ineghocket und woni acho bin isch alles verschwunde! sie hend mich gseh und sind richtig nervoes worde...wahrschinli nervoeser als ich...sie hend uf all faell no nie en blondine bi sich diheime gha, das isch fakt :) am ngng sini fruendin hed denn gad welle naeb mich anesitze und hed mini haar aglanget, wie wenn sie no nie so oebbis gseh haetti :) es isch uf all faell en unvergesslichi nacht worde...7 luet inere 1-zimmerwohnig vo oebbe 15m2 und alli hend glachet und gfiiret!!! joehh!! a real bangkok experience!!! han denn foeteli gmacht und sie am noechschte tag em ngng mitgaeh, demit er sie chan sinere fruendin gaeh, sie heig sie nuemme welle zrugg gaeh, hed sich so gfreut drueber!! so oebbis haett ich wahrschinli nid erlaebt, waer ich nid scho so lang da!!

also, ier muend uech kei sorge mache, d sarah passt scho uf mich uff :) wenn ier nued vo mier ghoeret, denn isch das es zeiche dass es mier guet gaht und ich s da gnuesse....i de meischte faell schriibi nur vill wenni eleige bin :)

na dann, bis bald meine lieben!!! lucia