So, das isch jetzt das zweite mal dassi in KL bin und da s mier bim erschte mal so guet gfalle hed, hani daenkt ich gang doch gad nomal abe. bin natuerlich wieder im gliiche hostel, das eifach nued bessers gid da in kl als s red palm!
han min letschte tag in krabi no gnosse. bin natuerlich no es verdients (fyr)abig bier go trinke ide old west bar. de inhaber gseht us wie wenn er useme western entsprunge waer, natuerlich mit asiatische gsichtszueg :)
i dere bar isch denn no en sehr fruendliche thai zu mier gsaesse. dezue muess gseit waerde, dass en durchschnitts thai eher nid gaht go reise, will sie so a ihri familie/nachbare/huustier wasausimmer bunde sind, dass sie das nid so eifach choend hinder sich lah. also, etz aber zum bob, de thai wo sich zu mier gsetzt hed! er isch fuer ca es jahr in irland gsi und red darum echli besser english als de durchschnitts thai. und fuer die meischte thais sind mier westliche backpacker halt eifach nur tourischte (was ich ja au nid verneine chan...will mier sinds ja au:),,,han ihm denn gseit, dass mier farangs (ebe uuslaender) ues maengisch echli komisch verhaltet i sim land und mier immer s gfuehl hend, dass mer uusgno waerdet (thais choemed logischerwiis alles vo handtaesche, zaesse, schnuck uf de maerkt billiger ueber als mier). denn seit er mier doch, dass mier alles mensche sind, und ich nid soell vo uuslaender und thais unterscheide....das usem muul vomene thai z ghoere ghoert wahrschinli zu de selteheite i dem land...han zerscht gar nid gwuesst was saege...aber natuerlich hed er recht gha, mer trifft halt aebe als tourist nur kei thai luet wo eso vo de waelt daenket! das isch wie wenn mer en nadle im heuhuufe gfunde haett!!
han denn no es bitzli mit ihm gredt und han somit en sehr gmuetliche letschte abig in krabi verbracht...will vorussichtlich wirdi nuemm so schnell wieder det ane gah!!
bin denn am tag druff abgholt worde, um min 17h trip nach Kuala Lumpur hinder mich z bringe! han denn gad in krabi es uu liebs paaerli atroffe, d catherine un de miguel. sie isch englaenderi und er en spanier...sie sind sit em mai ghuerate und goend jetzt uf en 1-jahres-hochsiigsreis rund um d welt! ganz ganz liebi luet! d foeteli choemed denn spoeter! 4h spoeter simmer in hat yai(churz vor de thai-malay grenze) acho, wo mer natuerlich zur belohnig gad sind go es bierli trinke :). sie sind denn aber imene andere car als ich wiiter nach kuala lumpur gfahre...aber zur gliiche ziit abgfahre und zur gliiche ziit acho. mier hend ues denn a de grenze wieder churz atroffe und hend abgmacht in kl zaeme go zmoergele, da sie naemlich no kei underkunft buechet hend! i mim car bini die einzig westlich gsi, umgeh vo haerzige muslimische maedels, wo ufem waeg bide znacht pause voller uufregig en hamburger bstellt hend...hehe, all hend giggelet und hend sich riisig uf ihres znacht gfreut! :) und suscht heds no es paar chinesinne, und jungi thai maenner gha...aber mier isches sehr sehr wohl gsi! sie hend mich aemel alli aglachet wo sie mich gseh hend :)
aebe, acho in kl am morge am halbi 5i simmer da zum red palm hostel ufe gloffe und hend bim inder grad naebedra kaffi trunke und toast und ei gaesse!
han geschter no de ganz tag mit ihne verbracht und denn sinds am abig scho wieder wiiter nach singapore!
de plan fuer huet isch shoppe...mal luege oebi oebbis netts gfinde fuer uech fuer wiehnachte!...ich weiss, s isch no chli frueh, aber wenni das paeckli abschicke, chunds vilicht irgendwenn im januar a, also passt eigentlich gad wieder so knapp ine :)
so, das waers fuer de moment wieder emal....ich gnuess no mini letschte 2 tag da in kl und denn gahts wiiter richtig suede,
bis bald, lucia