Aloha zaeme!

back in Thailand, i liebs vo Tag zu Tag meh.......jetzt bini wieder 2 Wuecheli da, und i wetts gar niemeh verlaa. Was bis jetzt mir passiert isch erfahreder da>>>>

Bim Landeaflug nach Bangkok hani aentli ( was heisst da aentli?!!) wieder ae male gspuehrt was fluege heisst. Glaubeds mer, so froh bini scho lang nueme gsi feschtae Bode under dae Fuesse z ha. Dae ganz Flug isch so gmuetlich gsi, doch bim Landeaflug haets agfange.... Es sind es par Luftboe cho und haend eus ae chli duregschuettlet. Dae Wind haet richtig gspilt mit em Flugi..... Mag mi noed erinnere dasi scho male Luet im Flugi han ghoert kreische. Und daenn no die Luftloecher...Jessaes, sogar min Mage wo suscht relativ bestaendig isch haet ae chli rebelliert. Zum Glueck noed meh... All haend sich fescht a Ihri Sitz klammered und es isch so ae unheimlichi Stilli gsi im Flugzueg* Noed so agnaehm, und daenn simmer doch voll wieder ufegange...Mer haend noed choene lande, supi.... Dae Pilot haet eus daenn mitteilt dasmer nomale ae chlini Rundi (vo 20 Minute!) muend fluege zum nomale probiere lande....Aes haet daenn immer no chli gwindet, aber zum guete Glueck haemmer daenn wuerki choene lande....Mit zittrige Bei hani daenn thailaendische Bode betraette.
Uebrigens, eigentli hetti en spoetere Flug gno, Aber i bin z frueh am Flughafe gsi und han daenn gseh das no ae anderi Thai Maschine nach Bangkok fluegt, so hani dae fruehner Flug gno. Mit em spoetere hetti sicher kei Turbulaenze gha. Maengisch sinds eifach chlini Entscheidigae wo grossi Sache beweged.....
Bin daenn witer gfloge nach Chang Mai im Norde vo Thailand! Det hanmer daenn es gmuetlichs Guesthouse usgsuecht wos mer unbedingt haend wellae aen Treck verchaufe, grad woni acho bin... Das isch aecht muehsam, hani noed so gaern waens eim fascht zwingend zum oepis mache.... So bini daenn noed gange, bin au chli z fuul gsi zum grad 3 Taeg go trecke....Nach 2 Taeg Stadt hani gnueg gha vo Stadt (vorallem nach Seoul und Tokyo), aentli wieder ae male welae ufs Land use.... Gnau puenktlich bini mit eme TukTuk zu dae Busstation cho, fuer min Bus nach Pai z verwuetsche. Vorane bini no i es Reisebuero zum mini Visas fuer Laos und Vietnam go bstellae, dured oepe 10 Taeg...Dae Bus isch au scho es Erlaebnis, eifach all Tuere und Feischter sind offe. Und waemer paech haet muesmer vilicht no stah, suscht bim sitze haet en grosse Maensch (als en Standard Thai) sowieso kae Platz fuer sini Chnueh!......D Busfahrt isch oepe ae so gsi>, vo Holperdi Polper, mit Chueh uf dae Strass, ueber Baerg und Tal umgaeh vo Waelder.....Dae Bus waer eimal fascht abglaege, bim deruffahre. Maengisch haeter wuerki nur choene derufschnufe. D Ussicht isch daefuer um so schoener gsi, die 4 Stunde Fahrt fuer Fr. 2.80 lohnt sich... Waenn sich daenn Baerge ebned und es gruens Taeli fuerechunt, daenn weismer dasmer bald in PAI isch.

*PAI* "Min" Ort da in Nordthailand. Es isch eigentli es Doerfli wo faeng zumene Packpacker Paradise agwachse isch. Das heisst es isch chli aber haet doch alles was mer brucht.. Pai haet 2 Hauptstrassene und 2 Querstrassene, 56 Guesthouses, 2 InternetCafis, jenschtes feini Restis, ae tolli Chochschuel (zu daem spoeter), Bars, Partys, unglaublich netti Luet, RiverRafting Buero, und eme plaetschernde Fluss; Pai isch umghae vo Baerge mit Waelder, Risfaelder und Doerfer mit Lisu, Karen und andere Staemm..... Hanmi vom erschtae Tag a wohlgfuehlt i daem Ort*** und i hett det choene Wuchene verbringae...hach... Es Bungalow hani gfunde diraekt am Fluss, bim ischlafe haet mer s plaetschere ghoert... Ae chli dae Gluehwuermli zueluege wies umeduesed, dae Staernehimmel beobachte und daenn schlaft mer uf ere duenne Matte wunderbar!.,.... (natuerli hani mini Gedanke daebi id Schwiz gha laaa...!..)....
Wie immer laernt mer schnaell Luetlis kaenne, so muess mer gar kei Angscht ha dasmer male aeleige isch... I saege waemer aeleige isch lernt mer no vill meh Luet kaene als waemer s 2. wuerd umereise. Am erschtae Abig hanmi ines Restaurant gsetzt naebed 3 Franzose vo Nizza, mit daene bini daenn am naechschte Tag au scho es Usfluegli go mache zumene Wasserfall. Dae eint vo daene isch raecht ufdreit gsi, mer sind daenn au dae Wasserfall durabgrutscht is Becki. Besser gseit is Becki gfloge, will es haet no en Jump (en Stei wo usegluegt haet) ufem abeWaeg gha....Yeah!.....
Will ich Thaifood ja wuerki absolut Yami finde und ich noed choche chan, waerum noed eifach laerne Thai choche! Im BEE BEE (so heisst die Bar/Restaurant) haends es abote, und i han daenn au ae persoenlichi Lehrerin gha. Han choene 4 Mahlzite uswaehle womer daenn zuebereitet haend. Zerscht simmer uf dae Maert gange go ichaufe. Han gstuned was alles fuer Sache git, da isch alles chliner oder groesser als bi Eus.... Es isch alles ae chli laenger gange mit mir zum vorbereite, bin halt scho chli en Hirsch mit choche..... Mer haend au noed nur choched, meh dumm umegschwaetzt und glached. Hans mega guet mit ihre gha. So hani male fuer dae Mittag aes Pad Thai choched, und es isch wuerki fein gsi!!!.... Ueber d Chuchi wotti jetzt noed z vill Wort verluere, Suberkeit isch det noed so gross gschribe. Drum muesmer sich au noed gross drum kuemmere waenn ae Muus ueber dae Fuess raennt. A so Sache gwoennt mer sich mit dae Ziit* Fuer dae Abig hani daenn es Rots Curry, Stir Fried CHicken Cashew Nuts und es Sweet and Sour gmacht.... Natuerli hani das noed alles choene aeleige habbere, drum hani choene Luetlis ilade. Am Schluss haend daenn oepe 10 Persone vo mim Food probiert gha. Bin raecht ueberrascht gsi uf die positive Antworte.... Yami HabaHaba und und... Es isch au mega fein gfunde, nur muess mi eifach wuerki langsam a scharfi Sache gwoehne... Haet mega Spass gmacht das z choche, und i wotts daenn au choene i dae Schwiiz witerfuehre......Also, mached Eu uf oepis gfasst..... a cook is born!
i daem Reschti haet au no dae Charly glaebt...eifach en typische Thai.... ae chli dicker und mit eme Irokese Schnitt... mer gseht en immer mit es par Girls am umetigere.....

Da ich natuerli noed han wellae nur "umehange" , hanmi igschribe fueren 2 Tages Rafting-Trip. Es haet sich au voellig bezahlt gmacht... Die 3 Franzose sind au mitcho, und so haets nur choene guet waerde... Eigentli hetti ae chli meh Stromschnaelle erwartet, so wie z Oestrich woni scho gsi bin... Aber es haet gar nuet gmacht das noed allzu schnaell gsi isch, will mer sind total mued gsi.. Ae chli z lang Party gha bis am 4i am Morge, und daenn go Rafte!... Party im Deja Vu! En Ort chli usserhalb vo Pai, dae Dancefloor isch dusse gsi und voll beschallt....Han det au wieder en Thai troffe woni in Koh Tao kaeneglaernt han, dae Voodoo, sogar Thailand isch chli....
So witer bim Rafte... Es isch wuerki guet organisiert gsi, mer haet immer gnueg z Habbere uebercho und z trinke, alles haet perfekt klapped, was ja in Thailand noed immer saelbschtverstaendlich isch.... Dae Fluss isch dur es Naturreservat gange, drum wuerki kei Hueser und Maensche. D Fahrt isch absolut schoen gsi, zmitzt dur dae Wald dure. Escht sind immer is Wasser ghanged und mer haet muesse ufpasse das die eim noed feschthebed.... Insgesamt haemmer 3 Boetlis gha, isch eh luschtiger mit meh Luetlis, so chamer schoen enand bespruetze. Oder halt mitenand fighte das die andere gar noed maerked das en Baum chund, und so sinds daenn halt underem Baum steckae blibe. Underwaegs isch daenn en wunderschoene Wasserfall cho, einae wo vo dae Site us dae Baeum usechunt. Wow! ...Tierli haets noed so vill gha, en schoene Hellblaue Vogel haet eus vill begleitet, suscht nur eimal ae Schlange im Wasser gseh und immer vill Schmaetterling..... apropos Wasser.. vill sind immer au go schwuemme, immer Bei voraa!...isch aecht wichtig, will es haet doch es par Stei im Fluss gha. So haet min Hinder daenn au d noechi gspuehrt vo es par Stei, bini schnaell wieder use....Aua..... Uebernachdet haemmer binere Family irgendwo im Schilf, die sind uuh fruendlich gsi, Dae eint vo Euse Guides (natuerli dae vo eusem Boot) haet daenn ae chli z vill Bierlis (das haets natuerli im Schilf) gha, richtigi tolli Underhaltig gsi... Han nur ghofft daser am noechschte Tag wieder haet choene s Boetli stuere...
Am noechschte Tag en Jump in Fluss vomene hoeche Baum und witer ischs gange..... Es par Stromschnellaene sind daenn doch no cho, aber noed zu gross. Aber s Ganzi isch eifach so schoen beruhigend gsi, und d Sunne haet au immer gschune!.....
http://www.activethailand.com/contact/raft_info.htm
Dae Aendpunkt isch Mae Hong Son gsi, aes Stettli miteme See und es paar Taempel, wie ueberall in Thailand.... Mit 4 Hollaender und 3 Franzose bini daenn go esn imene Schwizerreschti. Isch zu amuesant gsi, vorallem haets Personal fascht kei English verstande. S Aesse isch daenn s einte nach em andere cho, i han daenn mini Spaetzli mit Gulash gnosse. Am Beschtae isch ae Roeschti mit Original Schwizer Chaes gwertet worde, all haend immer ueberall probiert..... Han wieder ae male Heiweh uebercho....
Am noechschte Tag sind daenn all wieder usenand gstobe, ich han mi wieder inen holprige Bus gsetzt.

D Fahrt dasmal isch no schoener gsi, mer gseht bis nach Burma und d Waelder haet im Sunneliecht gluechdet!.....Daefuer hani doerfe oepe 1 1/2 Stund stah will dae Bus eifach volle gsi isch... Und zue gueter letscht isch daen no ae Hordi Iheimischer Chind zuegstige wo noed haend choene still si.... Usgstige bini daenn in Soppong, und vo det hani no es Motorrad-Taxi gno. No ae 20 Minuetigi Fahrt is Dunkle use. So haets mi id Cave Lodge tribe, die isch grad i dae noechi vo dae grosse Hoeli in Tam Lod... S Geniale isch die Lodge isch grad amene Hang und uf Holzpfaehl obe baut, mer haet ae gmuetlichi Ussicht in Wald. Gschlafe hani mit vill gesirpe und weiss suscht was no fuer Toen fuer Fr. 2.40 /Nacht. En richtigae Urwaldschrei ischs gsi, s Dach haet au die ganz Ziit irgendwo grumoret... Mini Lieblingsficher sind immerno die grosse Geckos* Han no nie einae gseh, nur immer ghoert.....brrr brrr Geckooooo Geeeckoooo Geeeckooo.... Es toent wuerki fascht wie "Geckoooo", uh haerzig!.... So hanmi next day i die Hoeli ufgmacht, begleitet vo 2 Huend. Die sind mer vom Guesthouse gfolgt, irgendwie haends mi gaern gha. Dae eint en uh haerzige chlinae Knuddel und dae ander en Dingo (Chico und Paco hanis tauft)... Beid uh liaeb!.... Und sie sind wuerki voll id Hoeli inecho, isch au noed normal. Sie haend immer wieder zoegeret und haend noed welae witer, hans daenn chli ghaetschlet, so ischs gange... D Hoeli isch wuerki riiiisig, und haet es par schoeni Tropfstei! Es fluesst au en Fluss dur d Hoeli.... Entweder chamer en Fuehrer nae oder macht sich saelber uf mit dae Taschelampe wienich.... Han au wieder usegfunde, jupii.... Fuer 100 Baht het mer daenn no sich choene ueber dae Fluss setzae la miteme Bambusfloss. Ca. 3 Meter ueber dae Fluss fuer dae Priis, voellig ueberrisse. Next male leggi Badhose a und watsche dur dae Fluss... D Huend sind glaubs richtig froh gsi wos wieder Tagesliecht gseh haend.
Suscht hani i daem Ort noed vill gmacht> gaesse drunke und d Natur gnosse.... Bin daenn am Abig nomale zur Hoeli gange.. Ab em 5i flueged fuer ca. 1 1/2 Stund all Flaedermues zrugg id Hoeli ine, voll krass. Dae Himmel isch volle vo daene Viecher und es hoert nueme uf... Es stinkt zum Himmel vo daene...
Das waer serscht mal i mim Laebe gsi woni en Hund gaern mitgnoh het. Dae chli isch so haerzig gsi und uh liaeb! Suscht bini ja noed unbedingt speziell dae Hundefan, aber dae!....tja......Er wird sicher no en Bsitzer finde, will i han daenn usegfunde daser en Streuner isch und noed zum Guesthouse ghoert....

Es haet mi wieder nach Pai zrugg tribe, hans noed choene la det nomale en Stopp zmache. Mit 2 Franzose bini daenn vo dae Busstation zum Guesthouse gloffe. Und die haend gmeint ich kaenn ja all Luet da, will es haend mi jenschtes gruesst (das nach erscht 3 Taeg i daem Ort). So isch Pai, eifach genial!!! Bin daenn no 3 Taeg in Pai ghanget, ohni vill z mache. Will es haet male so richtig graegnet. Bin froh gsi dasi ei Nacht noed usegluegt han usem Bungalow (wieder das diraekt am Fluss)... Will am noechschte Tag hani daenn gseh das s Wasser bis under mis Bungalow cho isch, han doch daenkt es rusched ae chli fescht*.... Anschinend haets ae chli witer unde am Fluss Bungalows ueberschwaemt, und sogar 2 neui Bambus-Bruggene waeggschwaemmt....Ups.... Natuerli bini nomale go Dance im Deja Vu, mit 3 English-Girls, 1 Israelin und eme Aussie... Haet noed vill Luet gha dasmal, aber mer sind trotzdem zu Dance-Musig abgrocket..... Haet guet tha wieder ae male richtig z dance, vermiss das so richtig.... Chum da halt noed so vill daezue...snief...
Bye bye PAi, i chume bestimmt wieder ae male!....I love it*

Jetzt isch Ziit mis Visum fuer Laos und Vietnam in Chang Mai go abzhole..... Fuer s Vietnam-Visa haends grad s beschtae Phoeteli, jessaes...oh schreck...
Jetzt bini scho sit 3 Naecht in Chang Mai und hans nonig gschafft mich richtig Graenze z schiebe. Will es isch da momentan grad no es Liechter-Festival, und huet soell dae Hoehepunkt si. Bis jetzt loents eifach a jedaem eggae Firecrackers ab, all freued sich wie chlini Chind.... Anschinend wird daenn ufem Fluss waens dunkel isch tusigi vo Liechtli uf schoene Boetli azuended, und die tribed daenn durab. Lan mi male ueberrasche.... In Chang Mai chamers au no ushalte, haet au vill easy Travellers ume... Miteme Canadien hani s Reggae Cafi unsicher gmacht, zum Glueck grad um dae Eggae vo mim Guesthouse. Isch eher Open Air als deckt, drum chamer waens raegnet so schoen dusse dance zu Reggae.... Ae Fuerstell haets au.... Lockeri stimmig detae, bis d Bulle mit Rotliecht ifahred am 12i und so duregaend das finito soell si... Thailand....
Morn wirdi jetzt frueh mich ufmache, dasi doch i 2 Taeg in Laos wird si. Vermuetlich fahri 4 Stunde Bus und daenn stigi um ufes Boot, anschinend die schoenschti Flussstrecki in Thailand. Lass Dich ueberraschn...

Uf all Faell wirdi Eu ufem laufende halte, hoff saelbstverstaendlich ihr mich natuerli au!!!.....
I ghoer immer meh vo Luetlis wo dae Winter werded uf Arosa ghaaaa. Neiiii, wotts noed ghoere. Voll fiiis, das chan eim richtig schlisse. Aber sie haend natuerli total raecht***

Gaern choendr natuerli fuer min Bricht stimme das so im User Tip zoberscht glaenzt. Falls er noed so glaenzd choendr natuerli au mir gaern es Mail schickn, ghoere gaern Meinigae....

Lose grad Radio 24 uebers Internet... Internet isch scho ae tolli Erfindig!.... let's do it like they do it on the Discovery Channel.....dadiddadadaa.....

Wuensch Eu alles gueti und daser vorallem noed z fescht fruehred.....Wuerki!.... Gnuessed d Expo-Vina, die wo goend, hicks......

take care

Maetti, 31.10.01