nach meh as eim jahr han ich endlich mini mittlere schwoeschter widr troffe. sie studiert zurzit in L.A. und hed mich i ihrem apartment wohne lah.

ich han mit ihre e paar sache unternoo und d'ziit gnosse. mir sind 1 tag ide universal studios gsi, wo du chansch bahne fahre und verschiedeni shows go aluege. u.a. hends zeigt wiae sie d'sound effects odr fuer mached, d'tier fuer en film dressiert (z.b. fuer de film "ein schweinchen babe" hets ueber 30 schweins bruucht - angeblich wachsed diae so schnell) odr d'fernsehshow "fear factor" gmacht hend. eus sind au verschiedeni drehoert vo films wiae "der weisse hai, odr d'serie desperate housewifes" zeigt worde. meischtens sind diae so schlicht und eifach gmacht, obwohls im fernseh denn grossartig usgseht.

straend vo santa monica sind eifach riiisig - uuh breit und elelang, es gseht ahnlich us wiae i de serie "baywatch" mit all dene lifeguard towers und gele auto's wo am strand umkurved. amene andere tag bin ich in hollywood gsi zum de beruehmti "walk uf fame" go ablaufe. abr ja.....han mir das chli pompoeser vorgestellt - du gsehsch eifach de hollywood bl und uf beide troittoirsite sind d'sterne am bode. anschiinend han ich vo dae falsche siite agfange, will ich bin langi ziit gloofe und han eifach keine vo dene person kennt - uuh peinlich, denn wo ich chli is zentrum chum bin, isch mir alles chli bekannter worde u.a. tom cruise, jonny depp, mike myers, arnold schwarzenegger und donald duck.

 mitti wuche han ich mir oepis fascht usichtsloses vorgno - bus fahre in L.A.  nach ueber 2 stunde bus fahre, laufe, umstiege und uuh lange staus bin ich in downtown acho. gigantischi wolkechratzer und multikulti viertel wiae "little tokyo, chinatown, mexico" hend mich beidruckt
 - im letschte bin ich mir chli bloed vorcho, will's nur mexikaner gha hed, nur spanish gsproche worde -und au alles uf spanish agschriebe gsi isch.
suscht bin ich no in malibu, bel air und beverly hills gsi / huefig go shoppe und natuerli schoeni beach taeg gnosse.
generell gilt in L.A. fascht immer stau, will jede mit em auto unterwegs isch.....sogaer ufere 4-spurige autobahn.

leider han ich vor ae paar taeg vo minere credit charte firma muesse erfahre, dass fascht kei geld meh ume isch. uiiiiii.....scheisse - het ich das huuus in hollywood halt doch noed soelle chaufe...........nei, nei seich - bin eifach pleite.

d.h nach 7 moenet reise, 6 verschiedene laender und sehr viel spass isch mini reis fertig. ich flueg noechscht wueche zrug id schwiiz.

danke eu allne fuer's fliisige lese und bis bald dihei.