fazit nach 5 moenet....und denn gahts ab nach laos!

nach wiitere 4 taeg in siem reap und unzaehlige tempel (dasmal gids kei foeteli meh...) saeged sich de ralf und ich tschuess. mer hend de ersti maerz und ich bin mittlerwiile sit 5 moenet underwegs. was i scho alles gseh han lad sich nid i wort fasse...und trotzdem fuehlts sich a wie wenni erscht gad acho waer...chan mich no sehr genau a die erschte paar taeg in malaysia erinnere und sogar no an morge wo mi s mami und de haense an flughafe bracht hend...und je laenger ich da aenne bin, desto meh daenki a mini familie und fruende diheime...de trip isch no nid ganz z aend, aber wenns nach mier wurd gah und nid nach minere finanzielle laag :) (hehe, mier hend da aenne all das gliiche problem), denn wuerdi mier es bungalow am meer buue und da bliibe!! aber kei angscht mami, ja, ich plane irgendwenn mal wieder z schaffe, aber ebe, moecht im moment eifach no nid so richtig dra daenke!!

und am namitag am 3 gahts ab nach laos...fluege nach luang prabang, miteme zwueschestop in pakse, im suede! und endlich endlich gsehni d sarah wieder!! chans gar nid erwarte wieder mal es maedel um mich ume z ha! s isch ja ganz amuesant wemmer 3 wuche lang um manne ume isch, aber ich han bald en ueberdosis vo diskussione ueber autos, mofas, pharmazeutische mitteli und bruuche etz es maedel zum gossip uustuusche!!!

han mer geschter no es paar t shirt ufem markt kauft und bin chli kreativ gsi...aermel abgschnitte, mit em uebrige stoff neui baendeli gmacht, was mer halt so macht bim reise, vorallem wenns eim langwiilig isch. im normalfall hani es schlaechts gwuesse wenni bi sunneschiin nid de ganz tag verusse verbringe, aber hey, ich han sit 2 moenet kei regetropf meh gseh, da muesch doch eifach mal en pause iiilegge! (pff...ok, wie wenni nid pause gnueg haetti da aenne, sorry ;)

also ab huet abig befindi mi wieder imene andere land, fraget mi nid wie guet d internet verbindige det sind oder wies mit de telefon funktioniert! ich versuech immerno s moeglichschte mit diheime in verbindig z bliibe...und daeddy...ich gib mer mueh au dier mal azluete ...kei angscht!! ich vermisse uech alli, und wuerd am liebschte allne aluete (fuer cash ueberwiisige, demit s telfoniere billiger wird fuer mich, meldet uech doch bitte bim mami!) :)

also demfall, tschuess cambodia, ich freu mich uf laos!!!

lucia