Action und Tradition in KL

So, es isch etz scho de 19. und morge am eis. ide letschte paar taeg hed min chopf chli pause gmacht und mier sind es paar luschtigi sache passiert. als erschts hani mal de flug vo singapore nach bangkok buechet fuer de friitig, demit nid wieder sonen busfahrt muess uf mich naeh. bin ufem internet go checke und han eine gfunde fuer weniger als 80 franke..gad aklickt, kreditkarte agaeh und buechet! zum glueck chunsch ja immer en bestaetigung per email ueber...bin denn nomal churz drueber gange, und siehe da, ich han en flug fuer im dezember statt im november buechet!! isch ja klar gsi...je weniger mer macht, desto fuuler wird de chopf :)...gluecklicherwiis hani denn 2h spoeter usegfunde dass mer de ganz eifach chan aendere, miteme uufpriis vo 30 singapore dollar...naja, bin ja selber tschuld! aber ich han en flug wo mich definitiv am friitig vo singapore nach bangkok bringt!

denn bini no bitz go shoppe in chinatown...han mer en uhr fuer ganzi 10 ringgit poschtet! (das sind chli meh als 3 franke). ok, mier isch ja scho klar gsi, dass das nid s gelbe vom ei chan sii, aber erwart ich zvill wenni s gfuehl han dass sie mindeschtens de ersti tag ueberlaebt? ich find also nid! guet, en tag spoeter bini die erschti uhr, wo nach 2h de geist ufgaeh hed, go zruggbringe und han en nuei uebercho, ohni problem und no miteme lache ufem gsicht :) han sie denn au gad drueber informiert, dass ich, falls das ganzi nomal schief gaht, d moeglichkeit han en tag spoeter nomal z cho...no problem mam :) ...ebe, natuerlich, wie erwartet, nach 2h...gute nacht! bin also nomal uf chinatown, und sie hend mi immerno aglachet...han en neui uhr vo de genau gliiche marke uebercho (DKNY swiss made natuerlich :) und sie hend mer xtra no d batterie gwechslet...so, und so isches dezue cho, dass au die dritti uhr nuemme funktioniert hed nach es paar stund. bin natuerlich (han ja suscht nid so vill z tue) geschter es dritts mal nach chinatown und das mal hends mi nuemme so herzig aglueget...da ich etz die 3. uhr i mine haend gha han und im regal nur no 2 anderi vo de gliiche marke gsi sind, hani mi fuer en anderi entschiide :) will die wo im regal gsi sind hani all scho mal mit hei treit vorher :) etz hani en uhr wo sit meh als 24h funktioniert, und bin zfride...wenn sie etz morn de geischt wuer ufgeh, denn chani das akzeptiere, 24h sind i mine auge naemlich fuer chinatown verhaeltniss jaaaahreeeee!!!

Huet am Morge bini i aller rueh nach kaffi und zmorge chli is bb plaza, es riiise shopping center um de egge...s isch ebe so heiss gsi und ich han en abchuelig brucht (Klimaalag ueberall!!! und deno gratis :). da in KL laufet so komischi gstalte ume wo backpackers aahauet und sie fraget woher sie choemed, denn verzellets der dass ihri nichte i das jewilige land gaht go schaffe noegscht jahr und moechtet dich ihre unbedingt vorstelle, also fragets nach email adresse und hostel usw...uf all faell ladet sie dich zu ihne hei ii und ueberredet dich zum pokere, denn fuellets der irgendoeppis ins getraenk und wennd denn endlich beduslet bisch, denn nehmets dich mit an bankautomat oder zumene goldschmied und loend dich alles moegliche a schmuck chaufe, so du ihne i dim himmeltruurige zuestand natuerlich ueberlahsch.....zum glueck bini vom hostel im vornherein gwarnt worde vor soettige sache, bin naemli vo zwei uu nette dame aghaue worde wo mer genau das gschichtli verzellt hend, han mich aber choenne mit schrecklich verplaente taeg druss use rede :) also action number one fuer huet!!!

denn bini am namitag vom kamel, en mitarbeiter da im hostel, iiglade worde anes "open house" das heisst soviel wie, d malaysier nachem ramadan em faschte moechet a 3 verschiedne tag denach es riiise buffet mit allem moegliche und jede wo moechti chan verbiicho. also hed de kamel mich gfraget und ich bin mitgange...eleige imene huus irgendwo usserhalb vo KL mit 20 andere malaysier und es paar schueche chinde, wo glaub angscht gha hend vor mier! s esse isch uu fein gsi und d luet ganz liebi!! das isch malaysia!!!!!

Bin danach heicho und han etz bis vor ere halb stund mit de sofie, der inhaberi vom hostel und eme andere malaysier friendich plauderet verusse! denn ploetzlich chund en asiatin wo huet iicheckt hed rasend an tisch ane, chloepft ihri fuuscht ufe tisch und seit mier ich soell gfaelligscht rueh gaeh ("shut up").sie heigi vom zimmer irgendoepper ghoert rede und saege sie sig en psycho! aber hallo!! ich han mer zerscht fascht ind hose gmacht, will ich so oebbis ueberhaupt nid erwartet han, scho gar nid isomene gmuetliche moment! denn hed ere d sofie gad mal d levite glaese und gseit sie heig gfaelligscht nid gaescht vom hostel azlaerme!! scho gar nid soettigi wo nued defuer choend...und en minute spoeter hed sie sie usegschmisse!! haei, ich bin au erliechteret gsi, das asiatische maedel waer naemlich im gliiche zimmer gsi wie ich!! brrr...aber weg isch sie!! und so sind mini sorge!! so, das waer also action nummer 2 fuer huet!!

mal ganz ehrlich, das ganze hed mi einigi naerve koschtet huet und etz isches scho fascht 2...also ab is bett und bis bald!