KL

So, huet hed de tag wieder mal wunderbar agfange. S hed uusgseh, wie wennd sunne endlich mal ueber de wulche wuer useluege....nene, falsch erwartet. bin and pudradaya bus station gange zum luege wenn am samschtig en bus zu de cameron highlands ufefahrt und bin det au en ganzi stund lang bliibe. s hed naemlich voll afa schiffe. de plan isch gsi schnell go nachefrage und denn wiitergah, ja nu. han denn en stund lang mit eme nette herr chli ueber malaysia gredt, er isch en local und weiss wos schoen isch. ganz es netts gspraech gsi.

so die erscht erfahrig mit dene steh-wcs hani au scho gmacht. s letscht mal woni so eis gseh han isch jaaahre her womer allig nach italie ind ferie gange sind :). han denn bloederwiis au mis naastuechli ins loch abegschmisse (..will aber vo da ewaeg nuemme ind details gah :))han geschter no bitz oebbis ueber s malaysische schuelsystem erfahre. die hend englisch ide schuel vo de 1 primar ewaeg. han naemlich gmerkt, dass uu vill vo dene verdammt guet english redet.

am namitag bini denn zu de lake gardens gloffe. das isch en riise park uf de andere siite vo de stadt und bin det in bird park gange (naja, fuer CHF 10.00 hani bitz meh erwartet, aber de eint oder ander vogel isch halt scho zimli faszinierend gsi :)

denn hed mich d sofie (owner of the hostel) geschter iiglade mit ihre ufne markt zcho irgendwo uuserhalb vo de stadt. eh voila, mer sind det go znacht poschte. ich han irgend es stueck poulet mit riis gha und chli sambal. han ja gwuesst dass das zuueg uu scharf isch, aber ich hans nid choenne lah. es isch eifach z guet gsi. naja, wie wenn mich die fuechtigkeit da nid scho gnueg zum schwitze wuer bringe :). mer hend denn oebbe 6 verschiedeni dishes kauft und hend es riise diner gha z dritte! mhh....also s esse... s esse isch eifach fabelhaft!

was zu kuala lumpur (oder wahrschinli ganz malaysia) muess gsaeit werde isch, dass d iiwohner da alli ganz ganz liebi sind. sie lached dich a (natuerlich chan das ganze "massage, massage" eim no schnell ufe keks gah, aber im moment gnuess ichs so richtig....sogar d polizii isch scho ganz nett amer verbiigfahre und hed gwunke :)also wenni mi da nid sicher fuehle, wo denn suscht!

das mit de foeteli muess i etz gad no uusprobiere. mal luege oebs klappet und ier es bitz en idee ueberchoemed vo dem wo ich da erlebe doerf.

bis bald, lucia